Mistanke om skrantesjuk hjort i Møre og Romsdal

Mistanke om skrantesjuk hjort i Møre og Romsdal

Denne saken er eldre enn to år

Veterinærinstituttet har i dag varsla Mattilsynet om mistanke om skrantesjuke (Chronic Wasting Disease - CWD) på ein hjort frå Møre og Romsdal. Det er ikkje tidlegare funne skrantesjuke på hjort i Noreg.

Prøvane er frå hjernevev. Vidare undersøkingar vil gje svar på om hjorten faktisk har skrantesjuke.

Den 22. oktober forsvarer Mariella Evelyn Güere Calderón ved NMBU doktoravhandlingen sin “Genetic variation in Norwegian cervids – relevance to the occurrence of Chronic Wasting Disease (CWD)”. Illustrasjonsfoto: Knut Madslien
Den 22. oktober forsvarer Mariella Evelyn Güere Calderón ved NMBU doktoravhandlingen sin “Genetic variation in Norwegian cervids – relevance to the occurrence of Chronic Wasting Disease (CWD)”. Illustrasjonsfoto: Knut Madslien

Førebels opplysingar er at dyret er eit eldre hodyr. Varianten av skrantesjuke påvist på elg i Trøndelag er også funne på gamle hodyr. Elg-varianten skil seg frå den som er funne på villrein. Det er for tidleg å seie noko om kva type hjorten eventuelt har.

- Det viktigaste no er å avventa fleire analysesvar og at vi held fram med å skaffa oss meir kunnskap. Prøvetaking i Møre og Romsdal bør intensiverast. Ut over detta har vi ikkje kunnskap i dag som endrar våre faglege råd rundt handsaminga av skrantesjuke i Noreg,  forklarer CWD-koordinator Jørn Våge i Veterinærinstituttet.

Før den nye mistanken, er det påvist tilsaman ti tilfeller av skrantesjuke i Noreg etter at Veterinærinstituttet gjorde den første påvisinga i april 2016. Dei ti tilfella er sju villrein frå Nordfjella og tre elgar frå Selbu og Lierne i Trøndelag.

Skrantesjuke er ein prionsjukdom på same vis som kugalskap (BSE) og skrapesjuke hos sau er det. Prionsjukdomar er knytt til unormale foldingar av eit protein som er normalt til stede i cellene. Enzymane i kroppen vil ikkje greie å bryte ned eit feilfolda prionprotein. Desse prionane vil hope seg opp i kroppen og gradvis øydelegge nervecellene i hjernen. 

Veterinærinstituttet står for alle analyser av sjukdomen og gir faglege råd til Mattilsynet i deira forvalting av sjukdomen basert på forsking på skrantesjuke og kompetanse innan prionsjukdomar. Veterinærinstituttet samarbeider òg med Miljødirektoratet og forskingsstiftinga NINA om handtering av sjukdomen og konsekvensane for hjortedyrbestandane i Noreg.

Les meir om skrantesjuke

Les også pressemelding frå Mattilsynet

Kontaktperson ved Veterinærinstituttet:
Jørn Våge

Del artikkel